قصايد البراح والضيق

قصايد البراح والضيق

سعيد حجاج

(1)

نفسى اكتب دلوقت قصيده
بس لأنى حزين مش قادر
حاسس ان كلام الشعر ا
سخيف
لابيقدر يرجع حق لناسه
ولا حتى بيهدى الفقرا
رغيف
ولا بينور شارع عتمه
ولا بيخلى الاخوانى
نضيف
نفسى اكتب دلوقت قصيده
بس لأنى حزين مش قادر

الموت مفرفط ع السكك
يامين يلم الجراح
ويقتل اخطبوط الحزن
فى عيون الرجال
يامين ياخد كراريس الوطن
ويكمل الدرس العويص
وينجد الاحلام من دجل الشيوخ
الدجالين
اللى واقفين مكان الله بيفتشوا
فى قلوب البشر .
ويكنسوا بدقونهم الحسنات

(2)

لو بكرة مش نازل .
خلاص ماتجيش
ولو مات الامل جواك
جوانا هايعيش
ولو حلمك على قدك
حلمنا قده مافيش
ولو عينك عليله ياولد
خللى عقلك
ماينطفيش
لو بكرة مش نازل
ماتبكيش على العيش

(3)

الحزن قتال الابتهاج
فى قلب لحظة الابتدا
والبوح ألم
وكراسى فاضيه مشتاقه
لقعدة صحبه وسهرايه
ترابيزات مرصوصه مستنيه
كوباية شاى
فنجان قهوة
كوتشينه تسرسب ليل
مليان بالبرد
مافيش حد
وبكرة ماجاش
ووالشهدا
نازلين تخبيط
فى التوابيت المقفوله
وماحدش عاوز يفتح
ولسه كراسى القهوة
فاضيه وبردانه
مرصوصه ومستنيه الرفقه
اللى محال هايعدوا
ويملوها
واللى بيفضل بس
سؤال
كان ليه الموت
لما الدنيا هاتفضل زى ماهى
مستنيه العدل
اللى ماعتبش الناحيادى

(4)

اطفال المتاريس
بيروحوا ولسه العتمه
فارده جناحها
على كل مكان فى الكون
وبتطفى الفوانيس
اطفال المتاريس
بيموتوا جماعات وفرادى
ويفوتوا القلب حزين
والفقرا لساهم فقرا
والعالم زى ماهو
جبان وخسيس
مليان مجانين
بيدوسوا على حلم الناس
المشتاقه لبكرة
من غير كوابيس
اطفال المتاريس
بيروحوا ولسه الضلمه
فارده جناحها
على كل مكان

فى الكون .

(5)

لومش نازل بكرة
تحارب خوفك .
خليك
لو مش نازل بكرة
تدافع عن قوتك
خليك
لو عاوز بكرة مزاد
مفتوع على بيتك
خليك
بس اوعدنى
تفضل صامد
لما تلاقى الاخوان
والمرشد
رافعين رجليك

(6)

ياأمنا الارض
الناس دى مش ناسك
ولا هما ناس جد
لو كانو عاشقينك
كانوا صبحوا حراسك
ولاكانوا باعوا العرض
ولا كان كبيرهم فجر
ولا فى الضلال ماسك
ولا فى البلاد هد

(7)

ريحة الموت ملت الشوارع
والاسفلت متغرق بكا
والريح بتفتح حضنها
والابجديه عاجزة
توصف مشاعرى الحزينه
مش قايل شعر تانى
غير لما ترجع الغنوة القديمه
للحناجر
ونهتف سوا تانى
الجيش والشعب
ايد واحده
وعاش الهلال ويا الصليب
وتغرق الرئتين عطور
الحريه
(اهداء الى الصديقه العزيزة
امنيه طلال شكر )

(8)

لو قلت لك وحشتينى ..
هاتصدقينى
ولا هتاخدى الكلام هزار
وتطلعى دينى ؟
وتفتكرينى تاجر كلام
ماليش فى العشق
والاحاسيس
من كتر دواوينى

عشت السنين الطوال
شايل غنوتى فى قلبى
العليل
بالف ع العطشانين كما السقا
فى قربتى روحى
وف روحى حبة حنان ريفى
وف ريفى تلقى الجدعنه فدادين
وف الفدانين الملك
اللى سابهم جدى لا بويا
ف حضن النيل
بازرعهم امل وسمو
وسمو الامير المؤمن الخطاف
الذليل
حرق الامل فى الفدانين الملك
وسرق قربتى منى
وساب لى روحى
متعلقه
على الكتفين
ونازله دموعها ع الوطن
سيل

عشت السنين الطوال
شايل غنوتى فى قلبى
العليل
بالف ع العطشانين كما السقا
فى قربتى روحى
وف روحى حبة حنان ريفى
وف ريفى تلقى الجدعنه فدادين
وف الفدانين الملك
اللى سابهم جدى لا بويا
ف حضن النيل
بازرعهم امل وسمو
وسمو الامير المؤمن الخطاف
الذليل
حرق الامل فى الفدانين الملك
وسرق قربتى منى
وساب لى روحى
متعلقه
على الكتفين
ونازله دموعها ع الوطن
سيل

(9)

صاحبى اللى بيلعب دايما دور الملاك
لقيته النهارده متغرق فى الوحل
وايديه ورجليه بتنقط طين
ووشه لسه بيضحك
وكأنه مش فاهم .حاجه
ولا قادر يخرج م الدور
رغم الدم السايل من انيابه
ع الجانبين
احسن حاجه فى صاحبى دهو
انه مصدق انه
كان ساقط من سابع سما
من ملكوت الرب
لوحده كده
بجناحين ورا ضهره
لونهم ابيض باهت
وان امه ماولدتهوش عادى زي الناس
لكن
وهى بتزغط بطه على سطوحهم
بصت لقيت حاجه بتسقط بين رجليها
وكانت هو
هدية الرب لابوه اللى مابيخلفش .
وأمه اللى مابتعرفش تعمل حاجه
غير انها تزغط بط ووز
وينزل ملاك على حجرها
فتتبناه وتسميه بنى آدم
وتوزع شربات ع الشارع كله
وتعمل له سبوع
وتطاهره كمان
وتلم النسوان يغنوله
وهو نايم بيعيط فى الغربال
كانه بنى ادم عادى
عادى جدا
اجمل حاجه فى صاحبى
4وبنضف اسنانه الحمر ا
من الدم
ولا حتى يودع
الوحل اللى مغرق
روحه .
اوحتى يرجع بالجناحين
للملكوت
ويريح راسنا .
ويغور م الارض

(10)

بجد وحشتنى نفسى
بقالى كتير لازرتها ولا هى
كمان بتزورنى
ساعات نتحجج بالمشوار
وتقولى اصل انت بعيد
وانا رجلى زى ماانت ملاحظ
مش قادرة اخطى من غير عكاكيز
وساعات بتقولى ماتيجى على روحك حبه
وتزورنى انت
ولا نت بتتعالى عليا ياواد ؟
وفاكر ان ماحدش زيك ؟
يظهر انك ناسى تطلع مين
مش اكتر من حتة واد هلفوت
كان كل شويه يزورنى
ويقعد تحت الرجلين يسمعنى
دلوقت خلاص ؟
ماشى لوحدك ؟
عايش من راسك ؟
وكانك ولا كان لك يوم
نفس بتحكيلها مواجعك
وتسبلها بعينيك
وانت بتحلم نفضل مع بعض .
عاجبك يعنى التوهه دهيه ؟
براحتك خليك
ان كان البعد مريح قلبك
خليك
ان كان الهجر دهو ا مروق بالك
خليك
يعنى هاتعمل ايه بيا ؟
هى كده الدنيا
والواحد بياخد له يومين
ويعدى
بس المشكل فينا
لو فضل الواحد منا
راكب راسه ولا بيزورش التانى
هايموت نوبتين
مش مرة ويرتاح
فبراحتك
خليك

(11)

. الله يرحمك يابا
سبتنى وحيد فى الغابه
لاناب ولامخلب  
ولا طلة ديابه .

(12)

مهمن رماك البين
واتفرقوا احبابك
هتلاقى ناس تانيين
واقفين على بابك
مادين ايدين الصفح
بينوروا اعتابك
وتلاقى ناس واطيين
وبينهشوا اجنابك

(13)

ولايهمك ياصديق
يهوذا كتر دلوقت
والمسيح فوق
والالف وش بيبدلهم
يوماتى
ساعات يضحك فى وشك
لكنه بيغشك
وساعات يقولك بحبك
وخنجره فى ضهرك
وساعات تلاقيه جنبك
فى وقت ضيق
بيعبى حقده فى صفايح
ويرشها ف عينيك
فماتفتكرش ان الصفا
موجود
الانبيا طلعوا السما
وع الارض عايشه
القرود

(14)

الشعر النهارده عويص جدا
زعلان
انى بقالى كام يوم
لا كلمته ولا كلمنى
ولا مسيت على ابياته
ولا مسيت بفيض قلبى
حروفه العطشانه حنيه
الشعر زى النبات بالظبط
محتاج يتروى احلام
وزى البنات بالظبط
محتاجه دلع طوالى
تموت لو تبقى منسيه
الشعر زى الخضار فى الغيط
لو فاس المحبه لم طاله
تدبل روحه ويعيط
ويطرح كلام اصفر
يشبه تمام الموت
الشعر زى الامل بالظبط
يقفل بابك المفتوح
لو قلبك ماباتش اخضر
وشجرة روحك العاشقه
كرهت حيطان البيت .

(15)

لما باعجز من جوا
ساعات شعرى بيبيض
وضهرى بيتقوس
وعينيا الاتنين
بابقى مش شايف بيهم
غير الابيض فى ابيض
وباحس بروحى بتنز
فوق السجاده
وباحس بجسمى متمدد
على خشبه عريضه ومبلوله
بدموع الناس اللى فى يوم
حبتنى من غير ماتقولى
وخبتنى ساعات فى نن عينيها
وانا متمرد ع العالم

(16)

الشهدا واقفين صفوف
شايلين فوانيس الامل
بيمدوا قدام خطوتين
سابقين خطاوينا
نواحى النور
فما تيأسوش
لو طالت
العتمه
لو مدت خفافيش الرغام
مخالب التوهه
ماتزعلوش الانبيا منكم
بدموعكم السايله على
الخدين
ماتحسسوش الشهدا
ان الطريق طال
وماكنش له لازمه
الفراق
وان الامهات اللى زغردت
يوم صعودهم للسما
كان اولى بيهم بكا
ودموع
الشهدا واقفين صفوف
مستنيين
نشفوا عيونكم
من الكوابيس ويلا
نفتح طريق للحياه .
بالعرق
او حتى بالاحزان .والموت

(17)

لو
فاكر ان دم الشهيد
ممكن يهم خرفان الوطن
اكتب وناشد احاسيسهم
يوقفوا سيل النزيف
انبح فى صوتك
واكتب قصايد
واعتصم فوق الرصيف
واحلم كماشئت ياثورى

يفهمك اكبر خروف .

(18)

طب انت عاجبك كده ؟
يابياع البلاد فى مزاد
لايبقى الشعب متغطى
ولاحتى لاقى الزاد
ولاماشى الامل فى عيونه
ولا فى كفينه عتاد
للزمن الردى الىى جاى
ما لابس الا سواد
طب انت عاوز ايه ؟
بعد الامل ما إترجم
جوا القلوب الوسيعه
وبعد الوطن ما إتكتم
من العقول الوضيعه
وبعد ماالخرفان
باعوها دى البيعه ؟
طب انت عاجبك كده
تبيع البلاد فى مزاد ؟

خليكوا خرفان للأبد
لحد اماتظهر قرون
كلوا اليابس والخضار
واسرقوا نور العيون

(19)

عيش وذاكر وشوش الخلق
وابدع وفن
الباقى هو اللى انكتب بالروح
مش الطنين والزن
واوعاك يجرك واطى وغبى
للسباب والمن .

(20)

انا بازعل عليك جدا
لما باشوفك ماسك فى ايديك
النبض وطالع تجرى
زى المجنون
متغرق جسمك بدموع
وبتنزف فيك الشرايين
ولما استفسر منك
عن حالك
بتقولى العشرة بقت بتهون
واصحابى الواكلين
على طبلية روحى
طلعوم خاينين
لاصانوا الملح اللى جمعنا
ولاضحكاتنا المغموسه
فى قهر الحزن الطالع
فى عيوننا
ولاشىء اصبح مضمون
انا بازعل جدا
على روحك
ويوماتى بافكر اسيبك
تجرى
ولا احاول اعيدك من تانى
ولا ازقك جوا ضلوعى
وتموت م الجوع
بس ازاى ؟
طبلية روحى الممدوده

اهه

اوعاك تنطرها برجلك لبعيد
خدها فى حضنك
بس اوعدنى
ماتبقاش موجوع
لو فكرت تسيبنى لوحدى
يبقى نروح دوغرى
نموت
وننهى كمان الموضوع .

(21)

لفارس اللى هناك
ف ساحة الحرب الضروس
فاعل ومتحقق
مش هنا
كمشان تحت اللحاف
م البرد .فى العتمه
او قاعد عليل ع الفيس
بينز ويولول
يخوض بسيفه الخشب
ويهد بالمعول
اركب حصان فعلك
وخوض الطريق الصعب
لو حتى م الاول
فرسك يكسب رهانه
ويشق السحاب اتنين
وتفضل كلاب السكك
تعلى النباح وتهول .

(22)

البنت اللى بتسرق قلبى
وبتاخده و تطلع تجرى
بيه فى الطل
مش عارفه ان القلب المسروق
بيهد الروح
وبيعمل فجوة غريبه بين الضلعين
مابيقدرش غير الحب
يسد فراغها ..
ارجوكى تعالى
الروح مش قادرة تفلفص
من بعدك
ولا بعدك بيخلى المعنى بيكمل
ولا روحى بترجع وتعافر

وبيهزمها اقل نسيم
من نظرة بنت بتقعد جنبى
وتبص من شباك الاتوبيس
وبتهملنى
ارجوكى تعالى
لو حتى القلب ماكانش معاكى
اهو ضلك بيخفف عنى
الموت .

(23)

اعترف لك
ان الطينه اللى نفخ فيها ربنا
من روحه وسواكى
ماكانتش هى نفسها
اللى اتخلق منها آدم
ولا حوا
دى كانت طينه اسوانلى
رماها النيل فى حضن الرب
وعجنها بالحليب والمسك
وسربها لاحلامنا
عشان مانفضل كده نايمين
لا عارفين راسنا من الرجلين
ولاقادرين نفوق منك .

                                                                                                              سعيد حجاج